第二十三回 外甥女聽未背後言 傢主婆出盡當場醜

按：吳雪香傢娘姨小妹姐見外甥女阿巧要哭，駭異問道：“啥嗄？”阿巧哭道：一我勿去哉！”小妹姐不解，怔怔的看定阿巧；看瞭一會，問道：“阿是搭啥人相罵哉？”阿巧搖頭道：“勿是。早晨揩隻煙燈，跌碎仔玻璃罩，俚哚無(女每)說，要我賠個。我到洋貨店裡買仔一隻末，嫌道勿好，再要去買，換一傢洋貨店，說要買好個。等到買得來，原勿好，要我去調，拿跌碎個玻璃罩一淘帶得去，照樣子買一隻。洋貨店裡說要兩角洋錢哚，調來也匆肯調。我做俚哚大姐，一塊洋錢一月，正月裡做下來勿滿三塊洋錢，早就寄到仔鄉下去哉，陸裡再有兩角洋錢？”
小妹姐聽說，倒笑起來，道：“故末阿有啥要緊嗄？耐個小幹仵末也少有出見個！耐拿玻璃罩放來浪，明朝我搭耐去買。”阿巧忙道：“無(女每)；勿呀！俚哚個生活，我做勿轉呀！早晨一起來末，三隻煙燈，八隻水煙筒，才要我來收捉。再有三間房間，掃地、揩臺子、倒痰盂罐頭，陸裡一樣勿做嚇半日汰衣裳，幾幾花花衣裳，就交撥我一幹仔，一日到夜總歸無撥空。有辰光客人碰和，一夜天勿困；到天亮碰好仔，俚哚末去困哉，我末收捉房間。”小妹姐道：“俚哚再有兩個大姐，來浪做啥？”阿巧道：“俚哚兩傢頭阿肯做生活嗄！十二點鐘喊俚哚起來