第三十二回 諸金花效法受皮鞭 周雙玉定情遺手帕

按：黃翠鳳未免有些秘密閑話要和錢子剛說，爭奈諸金花坐在一傍，可厭已甚。翠鳳眼睜睜看他半日，不禁好笑，問道：“耐坐來浪做啥？”金花道：“錢大少爺喊我上來個呀。”翠鳳方才會意，卻嘆口氣道：“錢大少爺喊耐上來末，替耐做媒人呀，耐阿曉得嗄？”金花茫然道：“錢大少爺勿曾說口宛)。”翠鳳冷笑道：“也好哉！”子剛連忙搖手道：“耐要勿)怪俚。高亞自個脾氣，我原說勿對個，一歇歇坐勿定，教俚也無處去應酬。”翠鳳別轉臉道：“要是我個討人像實概樣式，定歸一記拗殺仔拉倒！”子剛婉言道：“耐要教教俚個，俚坎坎出來，勿曾做歇生意末，陸裡會嗄？”
翠鳳從鼻子裡嘆出一聲道：“看仔倪娘姨要打俚乃末，好像作孽；陸裡曉得打過仔，隨便搭俚去說啥閑話，俚總歸勿聽耐個哉，耐說阿要討氣！”金花忙答道：“阿姐說個閑話，我才記好來裡。要慢慢交學起來個呀，阿對口夏)？”翠鳳倒又笑而問道：“耐來浪學啥口夏)？”金花堵住口說不出，子剛亦自粲然。
翠鳳吸過兩口水煙，慢慢的向子剛道：“俚個人生來是賤坯。俚見仔打末也怕個，價末耐巴結點個；碰著俚哉噸，說一聲動一動。”說著轉向金花道：“我搭耐說仔罷，照實概樣式，好好交要打兩轉得！”